آخـر مواضيع الملتقى

دعــــــاء

العودة  

دگتنآ آلرمضآنيه وسواليفنا الوزارية

منتدى رمضان
موضوع مغلق
  رقم المشاركة : [ 241 ]
قديم 08-24-2011, 05:21 PM
مستشار صحي
 

محمدالمطيري will become famous soon enough
افتراضي



المهم رجعت للبيت زعلان وطفشان على زميل الدراسة العزيز نايف الي ذبوه باول متوسط ج وان قعدت في ب وكئيب من السيد الشبراوي الي لو لا الله ثم مدير المدرسة كان كسرنا بصياحه وعصاته
جاء وقت الغداء ورجع والدي (ابوي بالسعودي ) من الدوام وخالتي مجهزه غدانا ومعنا عمتي (مالكم دخل في اسمها) ويزهمون علي وانا ما ارد (طبعا زعلان ) وجات خالتي تقول حمودي وشفيك ما تسمع الغداء على السفرة قم تغد عشان تنام وتقعد تذاكر العصر وانا اهز راسي يمين ويسار ( يعني مافيه امل اجيكم) وخالتي تقول حمودي من الي هاوشك او زعلك جعله البلاء قم تغد وابشر باالي يرضيك وانا اخذ المفرش واتغطاء ( من اليأس الي فيني ) وتمشي خالتي تخبر ابوي ويجي ويقول محمد ابك انت وشفيك من الي طقك وانا ما ارد وهو يقول رد وانا بوك من الي مزعلك ونفس الشي مطنش ابوي وهو يسحب الفراش ويقول قم يا ولدي تغد وابشر باالي يرضيك بس قم تغد وانا اصيح واقول ما ابي غدا كيفي فجاة دخلت عمتي وتقول هو وشف فيه قال ابوي مدري عنه زعلان مدري وش منه قالت عمتي مدام زعلان من لاشي ير ضى من لاشي خلوه ينطق وبلا دلع زيادة هو مايشوف ولدي فارس الي ينقز مثل الذيب ولايزعل مثل البنات وابوي يقول وصوته تغير قم ازين لك الغداء برد وحنا نشحذك تقوم ثواني ويشوتني شوته ربتو كارلوس على مقفاي واحس اني فقدت كلاي والكبد الطحال من قوة الشوته وعمتي تقول خل الدلع تستاهل وانا انقز ذيك النقزه واقوم اجمع بقايا انسان من اثر الرفسه واجلس على الغداء في منظر ماساوي للغاية وخالتي تقول جعله بروحي عنك وتهاوش ابوي تقول لاعاد تمد ايدك عليه
تغديت كم لقمه واقعد حزين وكئيب الين جاء ابوي وحلف علي اجلس جنبه وصب لي فنجال شاي وقال وش عندك وانا بوك قلت له انا ما ابي ادرس خلاص ما ابي المدرسه هذي بعيده وصعبه ويطقوني فيها (حلوه صعبه ما امداك اول يوم تقول صعبه) قال ابوي ليش يمكن انك ما حليت واجبك ( ارتفع ضغطي ميتين ) وانا اقول يا ابي العزيز وش واجبه وهذ اول يوم وابوي يبتسم لان خالتي قاعدع تضحك عليه وعمتي تطحن في البرحي والقهوه والمكسرات ولا ملقية لنا بال
المهم قالت خالتي وش الي ما جاز لك في المدرسة هذي قلت فيه مصري صعيدي كافر يدرسنل ويقول بذبحكم والشي الثاني انا ما افهم والا اعرف معاء زميلي نايف بس قال ابوي هذي الامور ما تقنعني قلت طيب فيه عيال بيطقوني في الفصل ما ابيهم وتنقز عمتي تمشي مليون وتقول وش رايك يسوون لك مدرسه لوحدك يا (محيميد) والا يطردون عيال خلق الله عشانك انت ونايف التبن حقك هذا وانا اقول لعمتي انتي وش دخلك يا العجوز الفقريه وابوي يقول ورع انثبر وانا اسكت وخالتي تقول خلاص بيمشي ابوك معك بكره ويشوف لك مكان ثاني وابوي يقول وشلون رفيقنا منيف الي عندكم وراك ما قلت انك ولدي قلت له اهو عرفني وليته ما عرفني اهو الي سبب المصيبه بفزعته قال ابوي زين يجي بكره ويصير خير
اليوم الثاني اداوم الصبح ومتررز في الفصل احتري ابوي ويدخل علينا في الفصل مدرس لغة عربيه سوداني بس ابيض شوي اسمه ابو بكر ويسلم ويدردش معنا ويقول انا داير كشكول ابو 60 قالو الطلبه ابشر يا استاذ وانا مدري شنهو الكشكول
الحصه الثانية جانا مدرس من اهل جدة او مكه بس انه حبيب مره ويدرس تربيه بدنية (رياضه) وننزل للملعب شوي زين ازين من مدرستنا الابتدائية المستاجره الي كل يوم الكوره في سطح الجيران وصياح العجز والحريم
المهم قال اانقسمو فريقين ومن الاسبوع القادم تجيبون جزم وملابس رياضيه قلنا طيب يا استاذ وهو يقول الي معه بدله رياضه يجي هنا طبعا الدقة القديمه يفصخون الثوب والرياضه تحت لها من الغسيل سنتين ويجون الي معهم ملابس حول سبعه والعشرين الباقين بدون قال المدرس ارجعو للفصل الاسبوع القادم نلعب وهو ينقز للمدرس واحد اسمه حمد ويقول يا استاذ نلعب عادي مثل الابتدائي قال كيف وهو يفصخ ثوبه ويراوينا الملابس الدخليه الي لو تمسكها تكسرت من الغبار (سنتي ما نغسلت ) قال له المدرس طيب والجزمات والولد نبيه وجاهز للاجابه العمليه ويرمي نعوله ويجي حافي المدرس انهبل وقال (ليه ما فيه نعول يا معيص ) قال عشان الكفرات توبلس دقيه والشعب يفصخ ثيابه والمدرس يبتسم ومستغرب الطعوس هذي وانا الولد الوحيد المحترم قاعد لو حدي والمدرس يقول ليش ما تلعب مع اخوياك قلت طيب قال بدل ثوبك وانزل الملعب قلت ما اقدر عشان فيه فلوس الفسحه قال لا تخاف وانا امسك طرف الثوب في فمي واحوس الملعب حوس ( المدرس يقول وشلون وهذ عاقلهم )
يوم رن الجرس للحصه الثالثة وكل واحد يلبس نعوله وملابسه وانا افقد فلوسي وادورها ما لقيتها (لو اني سمعت كلام المدرس كان ما ظاعت)
دخل المدرس الشبرراوي قليل الخاتمه وهو قبل يقول قيام وننقز جميع (من الخوف) ومعه عصاة طولها مترين
ويصيح كعادته مش عايز نفس او صوت وهو يكتب التاريخ والعنوان وانا احرك الكرسي ويطلع صوت ويناظر جهتي ويقول مين الي بيلعب هناك هكسر له دماغه وان من الخوف والربشه احرك الماسه ويطلع صوت اكثر ويصيح انت ما بتفهمش يا لوح (احسببه يكلم الماسه او الكرسي) ويجي ركض يمي ويقول مين الي بيلعب تلخبطت وقلت الكرسي مكسور قال لي انا هكسره على دماغك المره الثانيه ويلخني بقفاء اصابعه وانا اطيح بالارض وعلى دخلت ابوي ومنيف صديق ابوي ويشوفون الوضع بعيونهم ومنيف يقول للمدرس ليش يا استاذ وش سواء الطالب هذ قال المدرس بيعمل لنا صوت وازعاج بالفصل ومش عارفين نكمل الدرس
وانا اصيح من الحره والقهر كذاب (عشان ابوي يشوف كل شي ) يضربني بدون سبب ويزهم علي منيف ويقول تعال خلاص وينزل معي تحت للمدير ويخلوني عند الباب ويدخل مع ابوي عند المدير واسمع صوت ابوي يهاوش وخمس دقايق المصري يجي ويخزني بعيونه خز وان اقول له اوريك والله لاخلي ابوي يذبحك
المهم نقلوني للفصل الثاني مع نايف وبدات حلقات من الزحف بذالك الفصل
من مواضيع : محمدالمطيري
محمدالمطيري غير متواجد حالياً  
  رقم المشاركة : [ 242 ]
قديم 08-25-2011, 09:08 AM
Banned عضو موقوف
 

العـــود الأزرق will become famous soon enough
افتراضي

محمد


واصل يابطل وحنا متابعين


تصدق قهرني الصعيدي هههههههههههههه
من مواضيع : العـــود الأزرق
العـــود الأزرق غير متواجد حالياً  
  رقم المشاركة : [ 243 ]
قديم 08-25-2011, 01:39 PM
مستشار صحي
 

محمدالمطيري will become famous soon enough
افتراضي

وبعد ما نقلت الفصل الثاني شديت حيلي ونجحت وجبت الخمس طاعش وانتهت قصت اول متوسط

وش رايكم في الاختصار
يرفع الضغط صح
كله عشان القطه والشبراوي
في العام القادم احكي لكم قصة حسنين والجنينة
من مواضيع : محمدالمطيري
محمدالمطيري غير متواجد حالياً  
  رقم المشاركة : [ 244 ]
قديم 08-25-2011, 05:36 PM
المشرف العام

الصورة الرمزية نسائم
 

نسائم will become famous soon enoughنسائم will become famous soon enough
افتراضي

الأخ محمد المطيري

يعطيك العافية
بارك فيك
وماشاء الله عليك
تستاهل نعطيك من القطة
وألف شكر

من مواضيع : نسائم
نسائم غير متواجد حالياً  
  رقم المشاركة : [ 245 ]
قديم 08-27-2011, 05:45 AM
مستشار صحي
 

محمدالمطيري will become famous soon enough
افتراضي

قصتي مع المقناص

بلغت سن الرشد (العقل )عندما كنت طالب في ثاني ثانوي وبدا اهل الحارة وابي يثقون فيني بعد فقد الثقة لسنوات عديدة
وفي ذات يوم جاء عمي شبيب من مدينة الحريق (مدينة ما فيها دفاع مدني) المهم معه جيب شاص وابوي معه جيب لاندكروزر جديد بايامه 97 ومعهم ادوات القنص الممنوعه شوزن وغيرها ( لا احد يبلغ مصرح عليها) وصل عمي للحارة وانا بالصدفة كنت لابسة شماغ ومشخص عشان كنت معزوم في حفلة
نزل عمي وقابلني عند الباب وانا حيي به واقلطه وقال لي من وين هبت العقل عليك يا ولدي قلت له وش قالو لو لك كنت مهبول قال لا بس انت كنت مرجوج شوي قلت له يا عمي العزيز وانت يقول ابوي انك كنت اذوة وغثيث يوم كنت صغير والحين عقلت وهو يقول فهمنا يا محميد دخل عمي المجلس وانا انقز لخالتي واقول عمي شبيب جاء وزيني القهوة والشاهي قالت ابوك وين راح فيه قلت اكيد في المعارض قالت دق على مكتبه يجي يزهب عشاء عمك وانقز مثل الذيب واتصل على المعرض ويرد واحد كان يغثني اسمه فيحان شريك ابوي في المعرض ويقول الوه لوه من انت قلت انا محمد ابي ابوي قال من ابوك قلت ابو محمد (يعني انه فهم) قال ابك وش ابو محمد ذا (ابوي معروف لقبه باسم اخوي الكبير ماجد) قلت له ابوي قال ما عندنا ابو محمد تيت تيت تيت ويصك في ووجهي طبعا مشوار الاتصال مره لان الهاتف عندنا كان سحب ابو جرس كانه دركسون هايلكس وادق عليه مره ثانية واهاوشه ليش تقفل بوجهي يا بو كرشه ويوم زهمته ابو كرشة قال هاه يا محمد انت تبي ابوك قلت ايه قال دق بعد عشر دقايق الا اذ فيه مصيبه انت جايبها قلت له ابحتريك بس قل له ضروري عندنا حريقه في السطح والسطح مقفل ومفتاحه عنده مره ثانية تيت تيت تيت قفل بوجهي زعلت ورحت لعمي مكسور الجناحين وجبهتي فيها عفطه من تقفيلت فيحان بوجهي واصب القهوة والشاهي وعمي يسالني وين ابوك قلت في المعارض وبيجي بعد صلاة العشاء خمس دقايق واسمع صوت الباب طاق طق طق بقوة حسيت الباب انكسر وانقز بفقع وجه الي يدق وافتح والقاه ابوي قلت له وش فيك قال وين الحريق فيه قلت أي حريق قال انت الي اتصلت والا غيرك قلت لا اخوي خالد ( الي اصغر مني (لو قلت ماجد الي اكبر مني كسر وجهي ) قال طيب فيه حريق قلت لا بس عشان تجي صمخني بوقس على كتوفي تخالفت ومشى للمجلس ودقها سوالف مع عمي وانا قاعد اساوي كتوفي واكويها بدون مرزام عشان تستوي
رجع ابوي وقال اركب يا..... (كلمة شينه شوي) واركب معه للسوق ونحمل ذاك الخروف النعيمي ونحطه بالمندي يصلخه ويطبخه قال ابوي خلك في المندي وعطاني 200 ريال حق السلخ والطبخ وقال خلك هنا وجب الفاتورة عشان يمديني الحق باالسوق اجيب فواكه والاغراض قبل الاذان
جاني اليمني وقال وين صاحب الخروف قلت انا قال بنحطه لك في كرتون لانه ما فيه طبخ محجوز ست ذبايح ولا نقدر ابد قلت وش السوات قال خذ ذبيحتك قبل الصلاة ورح يم اقرب مندي ويعطيني 180 ريال وانا اهاوشه وين الباقي يا حرامي قال 20 ريال للصلخ واحفض لسانك لا اصلخك هنا وانا اشوف الساطوره واحترم نفسي واقول له طيب خل الكرتون هنا لين اجيب سيارة اشيله
رحت مشي للبيت يمكن حول ساعة وانا ادور ابوي ما لقيته قالو باقي ما جاء قلت لعمي ابي السيارة قال صعبه شوي انت يمكن ما ترف تسوق قلت له لا والله اعرف ومني ومنه واخذ السيارة بعد ان حلفت له مليون مره ان امشي 40 بس وارجع للمندي ادور الكرتون وما لقيته ومهاوش اما وعمل المندي نصف ساعة الين طردوني وانا اقول وش السواة الحين ضيعت عشاء ضيفنا يا والله البلشه
افحط بالشاص للسوق ولا عاد دريت وش اسوي بها المصيبة الي صارت
واذكر صديق المنقذ فهد حكيم الحارة وادوره من مكان لمكان لين لقيته وعلمه بالسالفة واقول له تكفى وانا خوك اب الفزعه قال تبي نروح نسرق ذبيحه قلت امحق فزعه بعدين نروح للسجن شف غيرها قال طيب ابوك عزم احد غير عمك قلت مدري قال تاكد قلت وشلون قال مر البيت وشف السيارات كثيرة ولا وهو يركب معي وصلنا البيت ولا لقينا سيارة الا سيارة ابوي بس قال زين ابوك اختصرها وما عزم احد (اثره وقت صلاة العشاء) والناس راحت تصلي
المهم قال لي فهد عمك ضيف ستار وما هو اجنبي بيستر عليكم وجب لك ربع تيس من المندي بالفلوس الي معك وقل لعمك السالفة وهو بيعذرك وبياخذ ضيفته بكره وانا احب فوق راس فهد واقول بيض الله وجهك يا اكثم بن صيفي حارتنا
رحت لشارع المنادي واجيب ربع التيس وادخله مع قسم الحريم لخالتي واقول اذ قرب العشاء حطيه
رحت للمجلس وكان الموجودين ثلاثة بس وانا اصب القهوه ويدق الجرس ويدخل بس خلال خمس دقايق كتيبه كامله حول ثلاث طاعش ويوم شفت الوضع ما يخارج انزل القهوة وانادي اخوي خالد يصب واعطي عمي المفتاح واهرب من المصير المحتوم
وتورط ابوي وضيوفه بالعشاء

اكمل لكم في الحلقة القادمه
من مواضيع : محمدالمطيري
محمدالمطيري غير متواجد حالياً  
  رقم المشاركة : [ 246 ]
قديم 08-27-2011, 06:02 AM
مشرفة سابقة
 

دمعــة..! will become famous soon enough
افتراضي

هههههههههههههـاااـأ حكاويكم تعدت الف ليلة وليلة
<<<خلف الكوالييييييييس
من مواضيع : دمعــة..!
دمعــة..! غير متواجد حالياً  
  رقم المشاركة : [ 247 ]
قديم 08-27-2011, 06:30 AM
مشرف سابق
 

قلم خـاص will become famous soon enough
افتراضي

ههههههههههههههههههههههااااي

لا والله الا التوهيقه

لا تعليق

حتى تكمل ما بدأته

بوحميد

كنت هنا .,’
من مواضيع : قلم خـاص
قلم خـاص غير متواجد حالياً  
  رقم المشاركة : [ 248 ]
قديم 08-27-2011, 03:53 PM
مستشار صحي
 

محمدالمطيري will become famous soon enough
افتراضي

هربت لصديقي الي فزع لي اول اليل وعلمته قال انا ما قلت لك نسرق خروف وتحلها قلت له انا ما اقدر اسرق دجاجه عشان اسرق خروف يا النعجه قال لي وش اسوي فكيك طيب قلت له انت الي بهذلتني بمشورتك الغبية قال انا وش يدريني ان ابوك بيجمع الجيران كلهم هو ويا وجهه وانا الخه بونية اعدل خشمه واقول لا تغلط على ابي (حلوه ابي هذي )يكفيه الفضيحه الي قدام الضيوف
قلت للمستشار شف لنا دبره اليله وين ننام عشان ابوي بيذبحني بدل الخروف الي ضيعته
قام يحك خشمه وقال ما فيه الا خيمتنا الي في البر مالك الا هي وانا اصيح فيه ذيك الصيحة صاحي انت الخيمة مرة وحده قال ليش تعصب الخيمه فيها عاملنا عصمان راعي البعارين ولا قال شي وانا اقول يا قليل الخاتمه نسيت جمايلي معك يوم انك تسرق فسحة الطلبه وانا عريف الفصل وما اسجل اسمك ولا اعلم واطلعك منها قال انت تاكل معي (طاحح وجهي) وقلت له كذاب انا كنت اكل وما ادري انك سارقها قال وين تبيني انومك فيه
قلت تصرف يا حكيم الحاره قال متى ابوك ينام قلت الساعة 12 قال زين انقز في حوشكم وخذ فراش ضيفكم (شين وقوي عين) قلت له وش عندك يكفي ما عشيناه بعد نسرق فراشه قال لا انا اقصد ادخل مكان نومه وخذ لك مخده وبطانية ونام بجنب غرفته عشان يحميك من ابوك
قلت له انا اشك اني بموت وكله بسبب اشوارك
نقزت بدون نعول للحوش وامشي مثل معيص بدون نعول وصلت للمدخل الرئيسي وادخل المجلس مثل الحرامي وبدون عنا لقيت فراش مربوط ولا فيه ولا واحد قلت وش الحظ هذ (نظلت نفسي) اخذت الفراش وبهدوء تام وادخل بيت الشعر الي مليان ريحة شيشه كح كح كح وازين فراشي واستلقي على الفراش ويوم صفاء جوي واقول في نفسي وش العلم ابك وين الناس لا حس ولا خبر وين طسو الضيف وين وابوي وين
قمت اتحسس الاخبار واستطلع واسمع صوت غريب وضحك عند مواقف السيارات والساعة وحده اليل (فيه امر غريب)
لقيت عمي شبيب يحط الاسلحة والممنوعات تحت الجيب في مكان سري (منسدح تحت الجيب) ويركب
ومعه واحد من اقاربنا اسمه عطاء الله يركب معه العدة والعتاد
ناظرت يمين ويسار وقلت ابوي ماهو فيه وين راح ومع التفكير سهيت واحط يدي على سطل كنت متخفي وراه ويسمع عمي الصوت وينقز من الخوف ويكبسني بكشاف معه ويجي يمي ويقول حيا الله محمد الي فضح ابوه بالناس وين الخروف وديته يا حبيبي قلت له السالفة قعد يضحك وقال ابوك نذر انه يادبك زين قلت وشلون تصرف ابوي قال ابوك ذيبان تحسبه دلخ مثلك قلت اكيد اخوك بتمدحه بس لا يكثر قل لي وش صار
قال ابوك راح استراحة فيها زواج وزهم على ابو العريس وقال له بالسالفة ودفع الف ريال واخذ خروف بدل الخروف جاهز (اثر ابوي ذكي)
قلت زين انها مشت السالفة قال جب ملابسك وخاونا للمقناص ازين لك ما يقضبك ابوك يذبحك قلت ابشر انا جاهز بس ابوب بيروح معكم قال لا يقول عنده مراجعه بالمستشفى لجدتك
قلت فكة من الهواش والقلق
نمت في الفراش وعمي ذبحه البرد بدون فراش واذن الفجر ودخل عمي وقعدني للصلاة وقال اركب ورانا طريق طويل








نكمل في الحلقة القادمة
من مواضيع : محمدالمطيري
محمدالمطيري غير متواجد حالياً  
  رقم المشاركة : [ 249 ]
قديم 08-27-2011, 06:26 PM
صحي متمرس
 

حلاي غير will become famous soon enough
افتراضي

محمد المطيري
يعطيييك العافية
من مواضيع : حلاي غير
حلاي غير غير متواجد حالياً  
  رقم المشاركة : [ 250 ]
قديم 08-28-2011, 04:55 AM
مستشار صحي
 

محمدالمطيري will become famous soon enough
افتراضي

اذن الفجر ويدخل عمي الى بيت الشعر الي انا نايم فيه وقعدني من النوم قمت وغسلت وجهي وصليت الفجر وعندما سلمت للصلاة سمعت صوت ابوي قريب مني نقزت تحت طاولة التلفزيون بدون حركة وهو يكلم نفسه وش جاب فراش شبيب هنا
جاء عمي ودخل بيت الشعر وابوي يحضر سفرة الفطور والقهوة والحليب ويسأل عمي ليش ما نمت بالمجلس عشان المكيف قال عمي حبيت بيت الشعر عشان المكيف فيه صحراوي صحي ازين من الفريون (يصرف عني)
المهم جاء الفطور مع اخوي خالد وانا انكسر ظهري من الجلسة بمكتبة التلفزيون وقال عمي لبوي عندي طلب يا بو ماجد قال امر يا خوي الكبير وطلبك جاك قال انك تسمح لمحمد يقنص معي قال هو وينه اول ابي ابرد حرتي فيه الي فشلني بخلق الله قال عمي بعد ما يرجع وف بحلفك وكسر راسه قال ابوي وصلك طلبك عمي زهم خالد اخوي وقال شف محمد قريب ازهم عليه يفطر معنا ونمشي وانا اطلع من الدولاب مثل القرد وابوي يناظر باستغراب واحب فوق راسه قال ابوي لو تحب رجلي والله لا اوفي بيميني بس افطر وا ذلف مع عمك افطرت ولقيت خير ومشينا انا وعمي للمقناص ومعنا الدلخ عطاء الله
وصلنا اول نقطة تفتيش قبل الزلفي الساعة ثمان ونصف الصبح واخذ العسكري اثباتاتنا وانا معي صورة كرت العائله قال العسكري وش جابكم معهم قلت ابغي اتعلم القنص ويقرصني عمي قرصه احس فخذي انقطعت وكانها قرصني عقرب وعمي يبتسم للعسكري ويقول الولد الله يصلحه وعدناه برحلة قنص بعد العيد العسكري قال اتكل على الله وخلو البزر يسكت من الهرج (العسكري ظنتي انه عتيبي او مطيري)
تحركنا شوي وانا اصيح بقوه من الالم قال عمي وش فيك قلت القرصه او جعتني قال توك تحس بعد خمس دقايق يا المفضوح
المهم قبل الظهر وصلنا قرية طريق المدينة اسمها وجات او حول الاسم هذ وهي قرية جبلية شوي وفيها مغارات واجد ويصفط عمي في مغارة ويزين القهوة وينزل اغراض الغداء ويقول لي انقز جب لنا حطب رغم ان معنا غاز بس نذالة في عمي تقول انه مطيري
جبت لي كم عود ولا يسوي بها ابريق شاهي وخوينا عطاء الله منسدح تحت السيارة يستخرج الاسلحة والمتفجرات

ساعة ويجهز غدانا ونتغدى ونشرب كم فنجال شاهي وننزل بر حول ثلاثين كيلو منطقه جبيلة ومخيفة مره وانا اشهد ان الجيب سيارة (على قولة ابو يمن) المهم عمي يناظر يمين ويسار وان بالنص مدري وين الله قاطني والاخ عطاالله يدربل بدربيل تقول انه بومه
المهم عطاء الله فجاة يقول ابك ابك ابك عنها وعمي كان بيقلب فينا من قوة برم السيارة وانا مدري وش عند العالم يصاحيون وبغو يكسرون السيارة وراسي معهم
واسمع طلق ناري وينقز عطاء الله و اشوف ارنب صغير مره مدري وشلون شافه عطاء الله على صغر عيونه الغراب

المهم قرب المغرب وحنا من هضبة لين جبل ومن جبل لين حفرة لين غربت الشمس وظهري تكسر من المناقز
وصلنا مكان وعر للغاية وصلينا المغرب ونزلنا فرشنا وشبينا النار وحطينا الارنب في النار شوي ونشوف نور سيارة وعمي ينقز مثل الذيب للسيارة ويرمي السلاح في حفرة قريبة منا وخمس دقايق وتجي السيارة جهتنا وعمي يقول لو تطري المقناص ابشيلك واحط بدل الارنب اذ قالو شي قل ندور بعارينا هنا والا انكتم وحنا نكفيك الكلام
وصل الموتر الجيب عننا ونزل منه ثنين كل واحد شنبة تقول ذيل فرس ويسلمون ويطلبون الاثباتات رغم انهم بملابس مدنية بس عرفت انهم حكومة بلبس المسدس
قالو وش عندكم قال عمي ابد ندور بعارين هنا قال الارض محمية واتكلو جنوب قلنا ابشرو
المهم الساعة تسع باليل نسمع صوت الذيب يعوي شمال والذيب الثاني يعوي جنوب وكان الوضع يزيد سؤء وانا خفت واقرب من السيارة واخذ عصاة معي من الخوف والصوت كل شوي يزيد الظاهر شمو ريحت شوي الارنب الي فاحت فوح عمي يضحك ويقول وش عندك خفت يا محمد وشلون لو تدري اننا بنمسي هنا
قلت له نامو انا بنام في السيارة قالو تعرف الذيب هذا وش نوعه واسمه قلت ايه اسمه الكسندر ابو ما وكلي بذمتكم هذ وقته
وفجاة .................
نكمل غدا
من مواضيع : محمدالمطيري
محمدالمطيري غير متواجد حالياً  
موضوع مغلق

مواقع النشر (المفضلة)

الكلمات الدليلية (Tags)
آلرمضآنيه, الوزارية, دگتنآ, وسواليفنا


أدوات الموضوع إبحث في الموضوع
إبحث في الموضوع:

البحث المتقدم
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

كود [IMG]متاحة
كود HTML معطلة
Pingbacks are متاحة



الساعة الآن 05:02 PM

ضع بريدك هنا لتصلك اخر المواضيع

ملاحظة مهمه :ستصل الى بريدك رسالة تفعيل بعد كتابة احرف التاكيد
يجب الاطلاع على البريد لاستكمال عملية الاشتراك


Powered by vBulletin® Version 3.8.9
.Copyright ©2000 - 2015, Jelsoft Enterprises Ltd
هذا الملتقى هو مجرد ملتقى لمنسوبي وزارة الصحة ولا يمثل الوزارة إطلاقا
وجميع المشاركات التي تطرح في الملتقى لا تعبر بالضرورة عن رأي إدارة الملتقى
ولكن تعبر عن رأي كاتبها فقط