آخـر مواضيع الملتقى

دعــــــاء

العودة  

بلوتوث بالكاتشب

الملتقى الأدبي
موضوع مغلق
  #1  
قديم 09-13-2011, 11:38 PM
مشرفة سابقة
 





قابله ميمي will become famous soon enough


بلوتوث بالكاتشب وهي تحكي قصة رجل ذهب من القرية لأحد المدن قاصدا احد اسواقها الشعبية وبالخطاء دخل لاحد الأسواق الفخمة ومن هنا بدأت الحيرة اين انا في سوق او زواج



امل ان تنال اعجابكم





دخلت لي سوقٍ ابي اشتري عقال
وشماغ احمر له معزة ومرموق



سوقٍ جمع امة محمد على هبال
من كثرهم ماكن براه مخلوق


قمت اتلفت كني السارق الذال
والقلب يركض مثل جربوع ملحوق


حاكيت نفسي هم بني عمٍ وخال
او اني داخل عرس واحسبني في سوق


انحش يامشعل شكل ذا بيت رجال
خابرني بعض الوقت عجلٍ ومطفوق


قلت إلا بقعد والله يدبر الحال
اما غنات الذيب او رحت مطقوق


من عذري كن الناس في عيد شوال
اللي مشخص واللي بزينه يموق


سألت لي واحد بغا يمد لي ريال
وشكيت انا اني لابسٍ ثوب مشقوق


قال أنت صادق بالله ذي كلمه تقال
هذا التطور انت ماتعرف الذوق


قلت ايييييه هذا هو التطور ذا الأشكال
اسف ياخوي ورحت انا لطابقٍ فوق


وياليتني مارحت غزلان تجتال
قطعان تمشي زينهن مابه فروق


وقمت اتفكر الضبى مالها جفال
بين الذيابه تمشي بغنج ورفوق


الوحده كن حجاجها رسمت هلال
من الكحل والرمش غصنٍ به عذوق


واللي شعرها يرتهش مثل شلال
والخد بالحمرة تقل كف مصفوق


ومن الكعب قصارهم صاروا طوال
الا مشت من علوه الراس مفهوق


وحسبي على هاك العبايه كما ظلال
تحسبها تجليده البستها من الضوق


تقسم الأجساد لو كانت نحال
ياجعل صانعها وبايعها للعوق


ويوم اقبلت هاك المزن برقها اشعال
قلت ابعد ابعد المطر يسبقه بروق


قمت اتحرا وقلبي للشوق مدهال
سحاب عجل خافق لماك مشفوق


واثره من المكياج محطوط بخبال
تفضحها ذرعانٍ تلوت بها عروق


قامت تغلا تفتكر خافقي مال
تغنج بعلك وتزوي لها شدوق


قالت وش تطالع وقلت المثل قال
السمكرة ماتخفي للخردة طقوق


افحمتها ومكياجها وكحلها سال
ذاب الصبغ صارت كما قدر محروق


واقفت عساها ماتجي لشاعرٍ فال
يقطعك وجهٍ يجعل الرزق ممحوق


وشفت اللي يتميلح يرزز له جوال
رقمي مميز كل بنتٍ له اتوق


ولبسه من الوانه تقل دفتر اطفال
ونظارة من كبرها كنها طوق


وهذا ايتمسمس مشيته مشيت ابطال
وش غنتره والزير للبنت معشوق


وقصات شعرٍ كنها قفول وحبال
ديك واسد هذا نمر ذاك غرنوق


ونظراتهم نظرت نضولٍ ومحتال
كلٍ عيونه طايره تقول مخنوق


وهذا وضع سكسوكةٍ مثل فنجال
تمس وجهه والزقم كنه البوق


وفزعت انا لواحد عصب راسه بشال
وش بك عسى ماشر وش فيك مفلوق



قال انقلع وش عرفك لبست بدال
ملقوف وش لي بورع مايعرف حقوق


وسمعت انا بلوتوث وخزنت بالبال
بكرا اتفلسف عند ربعي هل النوق


وسئلت انا بلوتوث وش تعني ياعيال
غشوني الله يغشهم اكلة ذوق


اطلبها بالكتشب ترى مالها امثال
واطلب موبايل تنسى قرصان ومرقوق


مانيب جايع بس من شفت البال
ركض للمطعم عسى ماني مسبوق


بلوتوث تكفا مع موبايل على الحال
تكفا ابي الكتشب على الخبزه طبوق


قام ايتحمد قلت وش فيك مهتال
قال انت صاحي ولا في عقلك فتوق


عشا اكتروني محنا يابان ياخال
احنا عرب ناكل ونشري ولا نفوق


قلت اصحا منك وماني من عصر جهال
ياخوك انا امزح جيت ابي بيض مسلوق


وضحك ترنبيلٍ تقل باص شغال
هذا المربط كيف اجل خبل مطلوق


قال البلوتوث بينهم خوش مرسال
خطابه نشميه تجي بعلم موثوق


قلت الا فلونزا وفيروس الأجيال
يعديك من عطسه بلا سلك وطروق


قلت العذر ياناس مانيب دلال
اللي يحرج له على شي مسروق


مع السلامة اشتقت انا لفوحت دلال
حول السمر والرمث في حزت شروق


ونفحات هيل تعطر انفاس فنجال
ونجرٍ لحونه تجعل البن مدقوق





منقوووووول
شارك
مشاركة في فيسبوك مشاركة في تويترمشاركة في قوقل بلص


من مواضيعي : قابله ميمي
موضوع مغلق

مواقع النشر (المفضلة)

الكلمات الدليلية (Tags)
بلوتوث, بالكاتشب


أدوات الموضوع إبحث في الموضوع
إبحث في الموضوع:

البحث المتقدم
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

كود [IMG]متاحة
كود HTML معطلة
Pingbacks are متاحة



الساعة الآن 08:33 PM

ضع بريدك هنا لتصلك اخر المواضيع

ملاحظة مهمه :ستصل الى بريدك رسالة تفعيل بعد كتابة احرف التاكيد
يجب الاطلاع على البريد لاستكمال عملية الاشتراك


Powered by vBulletin® Version 3.8.9
.Copyright ©2000 - 2015, Jelsoft Enterprises Ltd
هذا الملتقى هو مجرد ملتقى لمنسوبي وزارة الصحة ولا يمثل الوزارة إطلاقا
وجميع المشاركات التي تطرح في الملتقى لا تعبر بالضرورة عن رأي إدارة الملتقى
ولكن تعبر عن رأي كاتبها فقط