ملتقى منسوبي وزارة الصحة السعودية

ملتقى منسوبي وزارة الصحة السعودية (http://www.e-moh.com/vb/)
-   ملتقى ترفيه الأعضاء (http://www.e-moh.com/vb/f166/)
-   -   جدتي وسفرتي إلى كندآ (http://www.e-moh.com/vb/t137569/)

أمل 23 08-09-2012 09:30 AM

جدتي وسفرتي إلى كندآ
 
السلام عليكم ورحمة الله وبركاته ..
أسعد الله أوقاتكم بكل خييييير. أعزائي الككككرآآآم ..:smai:

طبعآ كالعاده شفت نفسي فاضيه وقلت يابنت ورا ماتسدحين مغامراتك العجيبه مع حبيبتك القميله

والكل بيسآل من حبيبتك ؟!!

انا آعلمكم من هي حبيبتي خلال القصه اللي راح تقرونها وان شاء الله تستمعون بقرائتها ولا يصيبكم الملل ..

هذا ياطويلين العمر والسلامه عندي جده خطيره << اتحداك تلاقيها رايقه :confused:...
دايم معصبه وبس اتهاوش هههههه << يعني دقه قديمه :)..
تبي الدنيا كلها مثل اول خبركم ماهي متآقلمه مع هالتطوير الحاصل لنا ككل ..
وطبعا انا مو مقصره انواع اللكاعه معها واحب تهاوشني استانس عليها ربي يخليها لي بس هههههه انا متركيه واتريق وهي جايبتن طبلونها بالدعاوي على اللي خربو الشباب والبنات هههههه < تقصد التطورات الإلكترونيه ههههههه


طبعا بحكم ظروفي العائليه .. صارت الظروف اني أسكن عند جدتي الحبيبه طبعا هي ربتني واعتنت فيني عناية شديده وتدلعني بعد << مااحد يفك شفرة التعصيب حقتها غيري<< مو اقولك تدلعني :fgd:


المهم ان جدتي هذي حريصه علي زياده عن اللزوم لدرجه اني اهددها اني انحاش عنها لو مابطلت هالحرص اللي ماله سنع << مااعرف احد اذا عصبت ههههههه.. المهم ماعليكم كلام ليل <اول مااصحى من نومي طايره اروح لغرفتها ادورها هههههههههههه:(

طبعا تجيكم السالفه ... بحكم دراسة الوالد إلا ان صارت له حوسه عشان الرساله واضطر ياخذ كورس لمدة أربعة اشهر في ( كنــــدآ) ..
وانا بما اني عاطله عن العمل ولا عندي شغله ولا مشغله ... قلت جاتك يامهنى ماتمنى :) ... وارفع السماعه واكلم الوالد << عندي نية للروحه ميه بالميه ههههههه
المهم بعد محادثة دامت اكثر من ربع ساعه بالآخذ والعطاء من السوالف قدرت اني اقنع الوالد انه ياخذني معه وبما انها فتره قصيره ..
منها اخذ لي كورس بسيط باللغه ومنها اساعده ببعض أبحاثه بحكم اني انا والوالد اقسامنا قريبه من بعض ... وبفضل الله تمت بحمدالله فكرتي بعد جهد جهيد من الأقناع والأمور المغريه اللي سويتها للوالد اني بساعده وكذا >> وانا من جنبها رايحه ابي اتمشى واخذها سياحه ولاطرى اشتغل ببحوث هههههههه

بعد ماقفلت من الوالد ماجاء فبالي إلا ( جدتي ) الحين كيف ابي اقنعها اني بسافر برا مع العلم ان الوالد تمت موافقته بعد مااخذ موافقه جدتي الحبيبه؟! :confused:
وخاصه انها جده عصبيه جدآ ويصعب التحايل او اقناعها بسرعه :)
<< مع العلم هي غاسله يدها من ابوي من يوم يومها لأنها تشوف اللي يسويه على هواه وهي تنافي هالشي بشده.. تبي الكل يدرس بمدارس الحاره وحولها ههههههه
:)


المهم اني كنت نازلة من فوق وتوجهت لصالة إلا اشوف جدتي جالسه رايقه ومزاجها عال العال .. قلت يابنت فرصتك .. واروح للمطبخ واجيب القهوه والتمر .. واجي اجلس عندها واصب لها فنجال هالقهوه .. قالت بس تقهوي انتي يانظر عيني ؟! < هينا دريت انها رايقه جدآ وانها راضيه عني وفيه مجال توافق على اي شي ابيه ههههههه .. واجلس اخرط عليها من الحتسي وجلست امدحها واقول ماشاء الله ياجده وش هالزين والله بعذر جدي يوم خطبك هذا وانتي كبيره هلون وشلون وانتي بيآم الشباب .. المهم انها ناظرت لي نظره تخوف وقالت الحمدالله الزين للحين عندنا ماهو مثل البنات الحين كلها صبغات وديكورات << تقل ازعلت اني قلت لها عجوز ههههههه< خفي علينا يابنت الأربع طعش :nosweat:.. طبعا كالعاده ابتسمت ابتسامه صفراء وقلت ايه صادقه << لازم مااخالفها الرآي لأن عندي موضوع بناقشها فيه ولازم تتم موافقتها عليه هههههه


وغيرنا الموضوع وجلست تسولف لي عن حياتهم قبل وانها احسن من الحين وانا طبعا مسترسله معها واناقشها بكل جديه هههههه
وبعد ماعم الهدوء علينا .. وانا انط بموضوعي بسرعه هههه< قلت يمه وجلست اتبسم هههههه << قالت والله ان عندك شي ؟؟ قولي وش تبين ؟؟
هي متعوده اجي الطش منها كل مابغيت اروح واجي ... قالت تبين تروحين للسوق << بقلبي اقول لو تدرين وش السوق اللي ابي اروح له ...
قلت لا ابي اروح مع ابوي لكندآ .. طبعا قبل مااكمل كلامي قاطعتني وقالت وشووووووو .. هو انتي صاحيه ؟! وين تروحين مع ابوك؟؟ ابوك يبي يروح لديرة الكفار ؟! انا صاحيه اخلي بنيتي ترووح لديرة الكفار ؟!
قلت يايمه انا ابي اروح ادرس وبعدين رايحه مع ابوي بيكون حريص علي اكثر من اي شي .. وانا رايحة لهدف وبعدين كلها فتره قصيره وراجعين ...
قالت هالموضوع لاتجيبن له طاري عندي ابد واجلست تقول هذي ديرتنا مليانه مدارس ؟ ماتتعلمين الا عند هالكفار؟!.. وروحة لديرة الكفار مافيه ... << طبعا هينا انا عصبت وعرفت ان مافيه حتى مجال اخلي احد يقنعها .. لأنها عنيده واللي براسها تسويه ههههه << سكت وقلت خير ان شاء الله اللي تبينه يصير ...

واطلع لغرفتي واجلس ابكي وابكي وابكي .. طبعا هذا العصر صار.. إلا وقت العشاء ووباب الغرفه يطق وهذي جدتي داخلتن علي.. قالت وش عندك ماتجين تعشين ؟! طبعا انا زعلانه واتكلم وانا مالي خلق << يقال ابيها تحن علي وتخليني اروح ههههههه ..< قلت لا بس ماني جوعانه..قالت لاوالله انا عارفه وش راكبن راسك .. انتي تبين تروحين لديرة الكفار وزعلانه عشان قلت ماتروحين .. وهو ينفتح الموضوع مره ثانيه .. قلت ايه وليه ماازعل وانا اشوف كل البنات يروحن وبعدين انا رايحه مع ابوي ومابي اروح غصب عنك ابي اروح وانتي راضيه .. المهم وانا اقوم ابكي ههههههههه وهو يصير مسلسل حزين وهي تجلس جدتي تبكي وتقول يايمه انا اسوي كذا لأني خايفه عليك من هالسفر وهذي ديار ماهي حولنا لو يصير لك شي مااسامح روحي وانا ابيك قريبه مني.. واجلست تحتسي من هالكلام اللي يكسر الخاطر وانا ماعندي احد غيرتس هههههه<< المهم عاد هينا مالي قلب انا يوم سمعت حكيها .. انا ابكي وهي تبكي هههههههههههههههه
اللي يسمعنا يقول ابي اسافر عشر سنين واخليها هههههههه
قلت خلاص ماعاد ابي اروح وانا راح اكلم ابوي بعد شوي واقوله مايسوي لي فيزا ... << ماقدرت على قليبها مالي غنى عنها ههههههه

وهي تقول يلا قومي تعشي دامك مو زعلانه .. والله واقوم واتعشى معها وسواليف وبعد ماتعشينا وجبنا طاري الموضوع مره ثانيه وهي تقول انا ماودي تروحين لأنها ديرة كفار وهذولا مايخافون الله وهذولا يخطفون المسلمات << ياديرة الكفار اللي امتحنتني فيها :)

المهم وانا اقولها اسمعي يايمه .. الحين احنا لما نروح لديرة الكفار بالعكس لازم نظهر لهم الآسلام والمسلمين بأحسن صورة .. وبعدين فيه كثير حريم بغطاويهن هناك مو كل من راح هناك ينسى دينه ..
وحسيت فيه تجاوب منها ودار حديث بيني وبينها وحاولت اقنعها بأكثر من طريقة وانفتح لي باب الآمل من جديد وقلت شكلها بتوافق لو اضغط عليها بعد هههههه
لكن للآسف عاودت بترديدها وشلون المسلمين يروحون لديرة الكفار؟! < من قال هالكلمه قفلت الموضوع عشان لاتصيبني حالة هستيريه هههههههه


احبتي الكرام ودي اكمل لكم لكن تعبت من الكتابه والقاكم بجزء ثاني ان شاء الله



الجزء الثاني
هل قدرت اقنع جدتي؟!
هل تمت سفرتي إلى كنـــدآ ؟!

عفويه 08-09-2012 10:00 AM

رد: جدتي وسفرتي إلى كندآ
 
ههههههههههههههه طاش ماطاش اجل

تيب بانتظار الحلقه الثانيه

ويارب توافق

أمل 23 08-09-2012 10:03 AM

رد: جدتي وسفرتي إلى كندآ
 
اقتباس:

المشاركة الأصلية كتبت بواسطة عفويه (المشاركة 853294)
ههههههههههههههه طاش ماطاش اجل


تيب بانتظار الحلقه الثانيه

ويارب توافق

طاش ماطاش من نوع آخــــر هههههههه

شاكرة لك على مرورك عزيزتي :smai:

اداري بالاتصالات الادارية 08-09-2012 11:18 AM

رد: جدتي وسفرتي إلى كندآ
 


الله يسعد ان شاء الله

قصتك شيقه مع الجــده الله يحفظها لك والواحد يتحمس

نريد الجزء الثاني



أمل 23 08-09-2012 12:38 PM

رد: جدتي وسفرتي إلى كندآ
 
اقتباس:

المشاركة الأصلية كتبت بواسطة اداري بالاتصالات الادارية (المشاركة 853305)



الله يسعد ان شاء الله

قصتك شيقه مع الجــده الله يحفظها لك والواحد يتحمس

نريد الجزء الثاني


ياهلا وغلااا فيك
إن شاء الله قريب الجزء الثاني .. الكتابه متعبه :nosweat:

اسعدني تواجدك :smai:

نسائم 08-09-2012 12:50 PM

رد: جدتي وسفرتي إلى كندآ
 
http://www.alashraf.ws/up/uploads/12998691111.gif


ماشاء الله
أسلوب رائع ومشوق في كتابة القصة
أعجبني كثيراً
بارك الله فيك
وفي إنتظار الجزء الثاني


أمل 23 08-09-2012 12:59 PM

رد: جدتي وسفرتي إلى كندآ
 
اقتباس:

المشاركة الأصلية كتبت بواسطة نسائم (المشاركة 853316)



ماشاء الله
أسلوب رائع ومشوق في كتابة القصة
أعجبني كثيراً
بارك الله فيك
وفي إنتظار الجزء الثاني

الآروع هو توآجدك في متصفحي :):smai::smai:

بسمه فجر 08-09-2012 02:25 PM

رد: جدتي وسفرتي إلى كندآ
 
الله يخس بليستس بعد فيه جزء ثاني
عزالله رحنا وطي
ههههههههههههههههه
دوووعابه فووطيتس قلبوه

أمل 23 08-09-2012 02:32 PM

رد: جدتي وسفرتي إلى كندآ
 
اقتباس:

المشاركة الأصلية كتبت بواسطة بسمه فجر (المشاركة 853348)
الله يخس بليستس بعد فيه جزء ثاني
عزالله رحنا وطي
ههههههههههههههههه
دوووعابه فووطيتس قلبوه

إيه فيه جزء ثاني ويمكن ثالث بعد
اذا شفت نفسي كسوله بالكتابه :):smai:

نووورتي بتواجدك عزيزتي = )

ملاااك 08-09-2012 03:14 PM

رد: جدتي وسفرتي إلى كندآ
 
الله يخليلك جدتس ويحفظها يااارب
وبإنتظااااار الجزء الثاني ياحلووووووه
بس لاتاخرين علينا


الساعة الآن 05:25 PM

Powered by vBulletin® Version 3.8.9
.Copyright ©2000 - 2015, Jelsoft Enterprises Ltd
هذا الملتقى هو مجرد ملتقى لمنسوبي وزارة الصحة ولا يمثل الوزارة إطلاقا
وجميع المشاركات التي تطرح في الملتقى لا تعبر بالضرورة عن رأي إدارة الملتقى
ولكن تعبر عن رأي كاتبها فقط